الأربعاء، 14 نوفمبر 2012

أخو الشهيد




قامْ وشدّ لحافو عنو
ورَاح يبكِي لغُرفة إمّو
أخذتو الإمْ في الحُضن
وصَارت تزيلْ
خوفو وهمُّو !
قلهَا يا يمَّا منا خايفْ
أنا جَاي أحكِيلك
إيش أنا شايفْ !
شِفتْ أخُوي الشّهيد .. 
عمْ يضحَك
والله كان معطَّر ومزيَّن بدمَّو !
والوجِه يا يُمَّا كنُّو الثلِج
والخدودْ
ورد أحمَر بـ ينشمُّوا !
والعيُون يا يمَّا كنْها البحَر
مِن شافها
تاهْ ونِسى همُّو !
قلِّي يا يمَّا أسألِك
عن حالكْ ؟!
وامسحْ دمِعتك وأبوسِ الراسْ
امبارح وانتي بتمْسِكي جبينُو
شافكْ ..
بس الجسَد ما كان فيه احساسْ
كان بدّو يضُمكْ
ويبُوس على راسِكْ ..
ويقلك تفرحِي بعرسُو
يا أعزّ الناسْ -
ووصّاني يا يمَّا أفدي هالأرضْ
وأخلّي الدم سلاحِي
والجسدْ مترَاسْ -
وازرع الأرِض ثورة
واسقيها بدمِّي
تثمرِ الأرْض وتِعطي للوطَن
حرَّاسْ -
وقلّي يا خيِّ  
لا تطوِّل غُربِتك عنِّي
خلي الشهادة ترسُم بدمَّك
نقش حنَّـــة
وسلّم يا خييْ على أمَّك وقلْها
" والله مادامَت فلسطين
لنزين الجنَّـــة "